紅館跨年騷終極加開3場 張敬軒盼戒手機癮免影響演出

文章日期:2021年12月07日

【明報專訊】張敬軒(軒仔)假紅館舉行《THE NEXT 20 演唱會》跨年騷,賀入行20周年,一再加場至15場,破了軒仔個人紀錄,昨日公布終極加場,加開最後3場(1月13至15日),不會再加開,共18場。

歌迷遭騙徒呃錢

軒仔透露很多人向他呻買不到門票,又有歌迷購票時遇騙徒呃錢,盡能力唱多幾場,免令歌迷失望。他說:「我考慮過體力、工作上調配是否可以等問題後,真心希望可以幫到歌迷朋友,等佢哋可以有再買飛的機會,先答應加場。」軒仔再勸喻歌迷不要向不明來歷的人買飛,有人付錢購票後便聯絡不上賣家,損失慘重。

唱五日 唞兩日

今次軒仔要應付18場演出,最近特別保重身體,天氣轉冷不敢怠慢,以免病倒影響工作,透露有專業團隊照顧他的聲帶健康,聲樂老師跟醫生商量後,都建議唱五日休息兩日最好,讓聲帶在最佳狀態;公司亦按專業意見規劃演出,讓他得到最多休息。

不過影響軒仔休息的最大敵人是手機,他說:「大家都知我有手機成癮症,成日一睇就唔知點解又天光,演唱會期間真係要戒,戒唔到點算?可能真係要搵人喺演唱會收工之後,收走我部手機,咁我先可以早瞓。」

娛樂組