不滿張惠雅批評人格 黎美言怒轟雙面人 拒重組HotCha

文章日期:2022年04月25日

【明報專訊】前女子組合HotCha成員張惠雅(Regen)近日宣傳個人新歌接受電台訪問,爆跟隊友黎美言(Winkie)拗撬最多,稱對方性格大剌剌,未必每個人都能容忍。言論觸動Winkie神經,於社交網發文怒轟Regen是雙面人還擊。

啞忍15年 有苦自己知

HotCha今年踏入成軍15周年,過往成員屢傳不和,今次Winkie被Regen的訪問焫着,發文大數對方不是,轟Regen借她宣傳新歌,「其實你過好自己人生,我覺得冇必要再喺你訪問度提起評論我,我哋已經係分開個體,因為對我來講,我都頂唔順你哋性格,人前人後一套、無team spirit、全為自己私心,唔係我當初追求嘅嘢,我鍾意一齊成功,唔係分開成功,所以係我唔玩,無奈我一直為咗大體,唔想影響大局,隱藏自己感受多年,很痛苦。啞忍15年,現在終於落到決定,我覺得坦誠善良相處,絕對好過畀人出賣,希望有一日你哋能夠懂得檢討自己,不要在人前扮弱者,關係是雙方不是單向,社會很多人都有情緒病,我亦試過,唔代表我唔出聲,不要用這種手法宣傳自己新歌」。

Winkie稱Regen多年來做很多小動作傷害她,手指只識指向別人,性格高傲自滿,未必每個人能容忍,應先嘗試檢討自己。她寫道:「我正式宣布,呢個組合我唔會再有興趣重組,粉絲們抱歉,15周年我曾經嘗試為你們爭取過演唱會,最後我選擇自己心靈行先,你無辦法想像忍耐15年,有幾受傷害。」

Regen公開向Winkie道歉

Regen隨後發文稱純屬誤會,向Winkie致歉,澄清訪問者是問她在HotCha中與誰最close及有沒有嗌交,「我其實是答和Winkie close啲,因為Winkie好多嘢都直接講出嚟,而我係buy呢一套,我表達唔好,其實係想講,好多人未必會接受咩都直接講嘅人,但係我ok佢呢個性格」。又透露Winkie最近以短訊主動關心她的情緒,「引起Winkie難受要講句對唔住,自知講嘢唔叻,就當今次是契機,從今以後所有關於組合的問題都不再回應」。

娛樂組