七仙羽想瞞住老公整容 預測張敬軒持續行大運

文章日期:2023年02月01日

【明報專訊】七仙羽(七師傅)前晚為網台任嘉賓,向節目主持嚴淑明請教美容心得。七師傅自爆幾年前已想接受整容「全餐」念頭,好多廣告商都提供免費醫美療程,但外籍老公認為她已經好靚,反對她整容,「上圍和臀部夠大不用整,但需要微調眉型、鳳眼,嫌鼻翼太寬、有虎紋,又想豐唇、去眼袋、改善皮膚、收腰,始終拍戲和節目,都想觀眾睇得開心,不想令人反胃,出於普度眾生才想去整容」。

七師傅稱是修行之人,不會受整容影響運程,亦想出妙計不讓老公知,「每次整少少,等黑夜才回家,鬼鬼祟祟上牀瞓,忍幾日消腫;他發覺我不同樣,就說睡眠休息得好。但我最怕承受打針痛楚,未過到這關」。單身的嚴淑明笑言暫時專心工作,不急於催旺姻緣運。七師傅反替她焦急,「仲要等幾時?不可以再等,更年期來的話,想要都不需要喇」。

指MIRROR年內重踏紅館開騷

七師傅預測「下世老公」張敬軒(軒仔)命格行緊大運,運勢持續到老,亦睇好男團MIRROR和ERROR發展繼續向好,今年MIRROR會重踏紅館開騷,她透露手上買了幾十張門票沒退錢。提到軒仔將會赴英國開個唱,七師傅沒捧場計劃,怕被誤會是狂迷,影響形象,亦不好意思要軒仔破費包機票食宿。

記者:鍾一虹