【明報專訊】李克勤相隔6年再踏紅館，將於5月13日至16日舉行《弦續李克勤‧港樂演唱會》，本月22日優先訂票，29日公開發售。克勤早前與港樂近60人一起拍攝海報，由於人數眾多，他們移師到演奏廳取景，由早影到晚。克勤20年前曾與香港管弦樂團合作開紅館騷，今次再相逢，海報設計充滿濃厚友情，用兒時玩具帶出由細玩到大的溫馨及歡樂，想告知大家音樂可以有好嚴肅一面，亦可以好輕鬆快樂，個騷好認真做亦可以好好玩。
克勤的海報造型由老婆盧淑儀負責揀衫，他笑言：「我拆開個衫袋，以為帶少了襯衫，點知打畀老婆，佢話：『你識咩，總之入面真空啦，乜都唔使著，係咁先靚。』老婆話乜就乜啦，覺得入面涼浸浸咁。影相嗰陣有工作人員竟然提我，李生你走光呀。麻甩佬都有人提走光，我覺得好好笑。」
克勤說疫情後，相信每個對音樂有憧憬的歌手，都等到頸長，好恨再一次在紅館做騷，「今次個騷，我希望歌迷觀眾可以多些參與，已經在社交媒體叫歌迷留言畀我想聽咩歌，大家同我一齊揀」。會否有特別嘉賓？克勤賣關子說：「有，其中一晚有個來頭好猛嘅嘉賓，睇大家買飛買唔買得中啦。」
娛樂組
