【明報專訊】陳慧嫻、肥媽（Maria Cordero）、伍仲衡、張佳添及周國豐昨日以評審身分出席《中年好聲音2》記者會，初次擔任評審的陳慧嫻表示已錄影4集，大呼玩得開心，「覺得參賽者很多都唱得好好，表現好平均，十分難揀，心目中有4名心水，有個唱鄧麗君歌曲的靚女，有個是澳門主播，好有巨星條件，亦有個男仔唱得好好，但講嘢似飲醉酒亂咁講，還有劉威煌，我覺得他唱得很好」。
參賽者唱《距離》無得入圍
陳慧嫻表示被賽制搞到好混亂。提到因聽得太入神忘記撳燈，她說：「因留意參賽者在台上表現，就唔記得咗撳，又唔畀我補撳，好彩該參賽者有四盞燈，如欠我一盞燈未能入圍，我會好內疚。」可有粉絲參賽？她說：「除了一個女參賽者唱我的歌，沒其他人向我『表白』，我講過唱我的歌會扣分，但該參賽者真的揀錯歌，揀了首不適合她唱的《距離》，首歌音域實在太廣，最後她只得兩盞燈，應該無得入圍，我有啲內疚。」
