【明報專訊】吳業坤（坤哥）昨日到沙田舉行新專輯《ただいま》粉絲簽名見面會，表示日前出席麥明詩婚禮後病倒，聽聞當日很多人出席完都不舒服，相信是人多聚集，「前兩日發冷發熱，太太不在港，得隻狗同我相依為命，因為要餵隻狗食飯，成為我每日落牀動力，好彩簽唱會前痊癒，雖然唱到歌，但表現不穩定，未如理想，希望大家見諒」。
坤哥相隔5年推出新碟，開心之餘又感觸良多，透露將出發到日本拍攝幾首新歌MV，可以寓工作於少少旅遊慶祝生日，「今次太太不會同行，所以過埋正日生日先飛」。他表示過往的MV，包括太太共有3次由日本人任女主角，今次亦有此意，交太太幫手決定人選，「不會有親熱鏡頭，也不會騷肌，發覺冇乜着數，得自己辛苦，冇乜驚喜」。他表示將來歌曲希望走日系路線，可會寫日文歌送給太太？他說：「之前寫過一首，未經太太同意就拿作旅遊節目《#好掛住日本》主題曲，我會努力再試吓寫歌給太太。」
