【明報專訊】黎芷珊主持的無綫新節目《芷珊約您》前晚首播，頭炮嘉賓溫拿樂隊，直擊他們在澳門的告別巡唱及吉隆坡宣傳活動。提到當年溫拿五虎中譚詠麟（阿倫）與鍾鎮濤（阿B）較受歡迎，溫拿1978年決定分開發展。
陳友解釋：「嗰兩個靚仔小鮮肉好多人搵佢哋獨立發展，咁你走咗隊band點呢？我覺得佢哋有難處，咁我哋3個（陳友、彭健新及葉智強）咪商量話不如停吓，各有各做啲嘢先啦，幾年後睇吓係咪再聚埋，唔通30歲仲彈結他咩，係咪應該各自搵啲事業呢？大家好兄弟，有啲嘢唔好等佢講，大家明吖嘛。」
溫拿後來建立每隔5年聚首開騷傳統，阿倫談到他與阿B的歌迷會否不和時，嚴肅說︰「我哋會教導佢哋，我哋係一隊band，鍾意我要愛屋及烏。」阿B說：「跟咗好多年嘅粉絲就冇分鍾意邊個同邊個嘅。」
阿B曾因投資失利欠巨債，2002年宣告破產，至2006年10月屆滿。阿倫憶起當時4隊友都想盡辦法，希望幫阿B渡過難關，「我哋成班有諗過，不如我哋開演唱會同佢搞掂啦，但阿B話唔使」。
阿B說︰「發生咗事情就面對，佢哋係好有心想幫我，但我嘅事應該自己承擔，就算係幫，都冇理由佢哋咁辛苦嚟幫我。」
娛樂組
