【明報專訊】張繼聰（阿聰）昨日以活動大使身分出席「中國香港國際籃球邀請賽2024」，希望更多基層兒童接受優良籃球訓練機會。熱愛打籃球的阿聰表示在家中整了個小型籃球場，與兒子張瞻一對一比賽，「多數我贏，他不忿氣，會趁我不在家苦練。他小時候已睇我打比賽，但近年才對籃球產生興趣，我會在打波時跟兒子溝通，好過嚴肅講道理」。他認為透過刻苦的運動訓練，讓兒子知道一分耕耘一分收穫，對將來投身社會工作有幫助。
談到太太謝安琪不捨得17歲兒子明年到海外升學？阿聰反而贊成他到外地讀書，「男仔要學識獨立，磨練吓係好事，在港生活太幸福了，什麼都有父母幫手處理，所以我鼓勵兒子課餘多啲跟同學去玩，同佢講乜都可以做、可以試，大前提要考慮是否會死或慢性致死，最緊要唔好死就得，因阿仔有同學飲酒、吸煙，問我點，我都叫佢自己諗。我反而唔想女兒去外國讀書，因為令我驚恐嘅事情實在太多！」
