【明報專訊】薛家燕（家燕姐）、關楓馨、冼靖峰與阮浩棕昨日宣傳無綫節目《家常便飯爭霸戰》，關楓馨伙冼靖峰、阮浩棕即席炮製蝦仁炒蛋，3人手忙腳亂，場面搞笑。
關楓馨受訪時稱以前在外國讀書時會入廚，多數煮西餐。曾否為男友下廚？她說：「以前有，現在為父母下廚。」大爆父親關禮傑不煮但意見多，只懂食和批評的「食評家」，「爸爸試過食媽媽煮嘅嘢，然後畀評語，結果激嬲媽咪，叫佢以後自己煮」。關楓馨希望將來找個廚師男友，讓她可以大飽口福。
家燕姐稱幾歲入行拍戲，冇時間學做家務，到20幾歲拍拖，在結婚前花了一年時間學烹飪，撚手菜是蒸魚。她曾跟李曾超群學煮餸，後來又去學其他菜式，連燒臘也識整。
問到仔女有否試過為她下廚？家燕姐表示子女在幾歲時，於母親節時試過入廚𧨾她開心，「返到屋企見到個大煲，一打開成煲都係燕窩，他們知我鍾意食燕窩，拿了幾盒燕窩去煮」。她稱燕窩價值約10萬元，幸好是贊助商送，但都肉赤。她將整煲燕窩放入雪櫃，每日只吃一兩口，吃了整個月，之後幾個月不敢食燕窩。
