繼ViuTV開台半年之後，另一獲得免費頻道的奇妙電視將於明年5月中開台，屆時會採用數碼頻道77台，24小時高清播放，大家都好想知究竟有乜節目睇?要觀眾睇婆媽電視劇?抑或純年輕人口味，但又未必睇得明，亦無共鳴的節目?
有感於目前兩家免費台的觀眾層比較兩極化，所以奇妙電視今日預先披露未來主打為觀眾提供娛樂真‧選擇，走貼地路線，做屬於香港人的電視台。據有線節目發展及製作總監陳詠萍透露明年開台節目，會有全新一輯《帶阿媽去旅行2017》，由司棋姐(李司棋)與女兒葉子青去東非肯雅，戚美珍就會與兒子苗俊到不丹，李彩華就會帶阿媽去印度，各有自己特色。至於黎燕珊再度發功，邀請圈中教仔女出色的星級媽咪，節目名為《朝拜傲媽》邀請一班圈中「傲媽」揭露教仔女讀書心得，構思中希望邀得接受訪問的「傲媽」包括:郭晶晶、曾華倩、吳婉芳及陳美齡等。
奇妙電視同時亦會與無綫舊將合作，如陳倩揚將主持《細細Love》，以新聞報道形式介紹飲食資訊，何傲芝與何傲兒姊妹檔主持《何家姊妹何家餐》，到訪不同藝人與名人家中開餐兼比拼廚藝，歐錦棠再加心理學家一起探討恐懼事物名為《無『恐』不入》等等。另奇妙電視亦會自製劇集及音樂節目，並有不少外判製作節目，希望令行業更有生氣，觀眾在電視上再找到真娛樂，令到一家人可以一齊坐低睇電視。
