近月常為反修例風波發聲的徐天佑，日前在社交網上載一張「香港、加油」字樣的鎖匙扣，不過有網民發現天佑左手食指明顯腫脹，昨晚天佑再在instagram貼相，並親自解釋原因，原來是他去年大意斷骨，但又因演唱會關係，未有及時醫治：「之前個po幅相隻食指有好多人問點解怪怪地（哋），唔洗（使）再問，我講~~~~上年演唱會期間因自己大意整斷左（咗）骨，初頭見到腫晒唔知咁大鑊，冇及時去睇醫生，之後睇中醫啊整骨啊嗰啲嘢都冇用，最後知道斷左（咗）骨要做手術，但已經臨近演唱會，我唔想包住隻手指做show見觀眾，所以推咗，結果演唱會之後，醫生話已經太遲，做手術都冇信心整得返好，所以依家隻手指彎彎地（哋），行（郁）動彎曲唔係太方便，之前咪話吹色士風，因為諗住放棄彈結他，演唱會嘅時候好爆，轉晒『單線solo』，再之後有人同我講可以試下轉音調彈結他，不過都冇乜用，點知而（依）家練練下（吓），又彈得返五六成水準，就係咁，唔洗（使）估亦唔洗（使）擔心我，有時命運總係會帶住我地（哋）。」
