鄭中基（Ronald）剛度過48歲生日，撞正新型冠狀病毒肺炎疫情持續，決定「幫到幾多得幾多」，將一箱箱的口罩等防疫物資交到有需要的長者及基層市民手上。
他在社交網分享與公司同事忙於包裝口罩的照片，留言︰「早排過年時見到啲老人家凍住排隊買口罩，仲要未必買到，真係好心噏。啲獨居長者冇口罩又點落街買餸呢？基層市民手停口停，每日都要返工，但公司又未必提供到足夠口罩同搓手液，其實佢哋仲危險。所以就叫同事幫手搵防疫物資，希望幫到幾多得幾多。」
「呢幾個星期馬不停蹄，採購、QC、包裝、聯絡機構、送貨，要感謝我啲同事同一眾幫過我哋嘅機動好友，辛苦你哋啦！稍後再介紹合作嘅兩間慈善機構，希望大家都多啲留意社會上需要被幫助嘅人士啦！」
