劉少君由於跟確診新冠肺炎的麥德羅有過緊密接觸而「中招」，今日他在病房內拍片親述現時情況，他先簡單拍攝病房內環境，之後對鏡頭表示：「呢度喺我住嘅一個人嘅隔離病房，呢幾日都唔可以做運動，因為我瞓喺度講嘢就OK，但係如果一坐喺度就講唔到說話，就會有好多痰湧到肺部，我諗呢個過程仲要3日，3日之後就可以做運動，到時再講畀大家聽，多謝晒。」
劉少君之後再短信錄音作補充：「呢成個星期都打仗中，今日就係瞓喺度先可以講說話，如果坐低或者企喺度就好難講說話，因為嗰啲微菌仔喺我肺部度搞吓搞吓，咁我就會咳，咁就講唔到說話。醫生講呢啲微菌仔係有段時間，另外，要我哋多啲食蛋白質嘅嘢，即係食多啲雞肉、雞蛋、鮮奶、豆腐，豆腐花都得嘅，呢啲對我哋身體有抵抗力，豬肉牛肉就幫唔到手。如果所有觀眾聽到，不妨食多啲高蛋白質嘅嘢保護身體。」
