張建聲早前在社交網上載面部輪廓消失、「身懷六甲」肉感非常的照片，並自爆體重已逾200磅，他表示間中有胃痛情况出現，網民留言叮囑他小心身體。
張建聲表示他為新角色而努力增磅，目標由180磅增肥至220磅，現在1個月時間，已經有20磅「進帳」，阿聲說：「坦白講係傷身，會易攰、眼瞓、食到胃痛又胃抽筋，間中要食胃藥止痛，不過我計過，一共要增30幾磅，唔係冇可能，3月我就38歲，趁有能力就做咗先。」
今次新戲是新導演和新編劇班底，題材為60至80年代港產武俠片，阿聲飾演懷才不遇導演，為人好hea，做事求其，阿聲說：「導演睇過我訪問、知我做嘢方式，角色為我度身訂做，令我好榮幸，睇過劇本好喜歡，值得為角色增肥。」
另外，新一年阿聲亦有新動向，他會離開合作9年、一手提攜他入行的蕭定一老闆公司，阿聲說：「蕭老闆畀咗好多演戲機會我，由《一路向西》、《壹獄壹世界》、《作家的謊言》等，特別《反黑》中的「招積」一角，令到大家認識到張建聲，好感謝蕭生，佢可以話係我伯樂，好多謝佢。」
