大叔的愛︱Edan遭誤會非禮巴士女乘客 黃德斌「英雄救『爵』」 (17:56)

文章日期:2021年06月21日

由黃德斌、MIRROR成員呂爵安(Edan)、盧瀚霆(Anson Lo)和徐㴓喬(Asha)等合演的ViuTV劇集《大叔的愛》,將於下周一(28日)晚首播。劇組陸續公開拍攝片段,其中一場戲拍攝Edan在巴士上,被誤會非禮女乘客,黃德斌「英雄救『爵』」,為Edan解圍後,更把對方擁入懷中!

德斌笑言該戲分是「巴士奇遇結良緣」,他表示自己也不時坐公共交通工具:「因為太方便,唔使周圍搵車位,我哋平時坐車都收埋自己,唔會招惹啲乜嘢誤會,即使見人鬧交都未必出聲,除非去到動手動腳,如果唔係,唔會介入人哋鬧交。」

自嘲好窮的Edan表示,自己是巴士常客,他笑言車上不時與Anson Lo以短信傾劇本:「我哋之前真係好驚,因為呢部劇買晒版權,要喺原著同自己風格中搵平衡,可能我哋未夠專業,平時我哋都會攬頭攬頸咁玩,所以唔會太尷尬,最近係Anson自己加戲,或者拍惜惜戲嗰陣加啲嘢,咁就嚇親我囉!」

Anson Lo表示投入與Edan的感情,不時向對方獻媚:「冇辦法啦,識咁耐都唔會黐咁埋傾偈,所以都幫佢攞飯、攞埋餐具,做到細心啲咁,希望可以搵到嗰份感覺。」

(即時娛樂)