泳兒新歌由坑渠玩到落海 「聲夢」Yumi Archie嗌恐怖 (20:30)

文章日期:2021年08月04日

泳兒(Vincy)前年邀請合作多年的填詞人周耀輝,為整年歌曲系列擔任概念指導,並決定以「花」作為主線,透視Vincy心中的遐想;去年周耀輝再為Vincy操刀,順着「花」從地上跌在地下,流在心中「溝渠」;今年則輪到「海洋」,是第三部曲的主要概念。Vincy說:「完成咗『溝渠三部曲』,之後就開一個新嘅章節,呢個章節由地底嘅溝渠流向大海,新歌就叫做《荊棘海》。」

新歌MV昨晚(3日)已上架,這次繼續找來合作無間的Sheng擔任導演,團隊走訪南生圍、龍蝦灣、大網仔村及海星灣場景,並拍足20小時。由於要配合MV氣氛,團隊租用神秘感十足的大屋,工作人員千叮萬囑Vincy切勿亂動大屋內擺設,令她雞皮疙瘩。

拍攝期間,Vincy更被自己嚇親,她說:「喺山上面跳舞時,突然有好大隻蜜蜂『嬲』住我,因為我好驚蜜蜂,我就大嗌,同事話『走咗㗎啦!走咗㗎啦!』但我望到未走,一路喺我手上面,同事堅持話走咗,我話冇,最後我再望,原來係我嘅黑色指甲。」

MV首播後,Vincy於社交網開直播跟網民討論新歌,Vincy的「聲夢學生」冼靖峰(Archie)跟鍾柔美(Yumi)亦有觀看直播,難得聚首,Vincy便邀請二人直播,Archie十分識做,第一時間表示已看過MV,並叫Vincy講解歌曲內容,十分搞笑。

Yumi也表示MV電影感十足,她說:「好似一套戲咁,一開頭我係有啲驚,但係見到泳兒老師喺度,我唔驚啦。」Archie同意說:「一開始好暗黑嗰種感覺,令人毛骨悚然,但你一出場嗰吓,我就即刻舒服咗。」聽到學生觀感,Vincy即笑說:「我嘗試演到有啲恐怖㗎喎,但我一出嚟你哋就唔驚,咁好失敗喎。」

(即時娛樂)