吳彥祖由藝人變職業賽車手 等多1年先返港拍戲 (13:41)

文章日期:2021年11月01日

吳彥祖和太太Lisa S.及女兒Raven目前在美國生活,因為疫情關係,未能返回香港工作,但卻令吳彥祖重拾對賽車興趣,甚至成為職業賽車手。

他說:「一直好鍾意賽車,好羨慕郭富城、爾冬陞、方中信、錢嘉樂,但以前住香港,冇機會接觸,又唔熟悉呢個範疇,直至搬返美國,可以揸自己車去真正嘅賽車場玩,之後就諗,仲有咩進步空間呢?最後決定去比賽。」

由藝人變成賽車手,吳彥祖一切由零開始,好友馮德倫得知他的經歷,於是提議幫手拍片,記錄他的轉變及比賽過程,並找來擔任《林書豪 Linsanity》紀錄片導演Evan Jackson Leong幫手,製作成《吳彥祖的速度之旅》(Journey to Speed)紀錄片,並於Highlighter Channel播出。

他說:「今年參加咗6場團體賽,暫時我哋總成績排第2位,希望可以一直保持,同埋以我咁新嘅車手,可以攞到呢個成績算好好。另外年底會跟隊友,參加『Thunderhill Raceway』嘅賽事,需要連續25小時不停比賽,希望大家睇完呢套紀錄片,可以見到另一面嘅我。」

賽車有一定危險,太太Lisa可有反對聲音?他說:「其實賽車係快,但唔算危險,起碼我架車有防滾架、有頭盔、有頸箍保護,相比起Lisa騎馬,得個頭盔、跳馬完全冇保護,所以Lisa冇特別意見。」

問吳彥祖什麼時候回港拍戲?他的廣東話有沒有退步?他說:「如果有戲拍我會返嚟㗎,但我驚自己接受唔到一個人喺酒店留21日,所以可能等多1年,唔使隔離我就會返嚟。其實依家比賽有另一隊對手,佢哋係香港人,雖然我哋係敵對,但我一見到佢哋就好開心,因為可以同佢哋講廣東話,平時就真係冇乜機會講,所以冇喺香港時候講得咁好。」

(即時娛樂)