黃子華、張繼聰及王菀之（Ivana）日前接受由許文軒主持的《StarTalk》訪問，大談合作新戲《飯戲攻心》感受。
Ivana表示可跟黃子華合作大感緊張，她說：「好彩之前客串過子華神執導嘅電影，有咗上次嘅合作，今次冇咁驚，一開工已經有種親和力，好快就令自己放心，好容易投入。」
談到劇情令觀眾更珍惜與家人同枱食飯，張繼聰說：「我同父母一齊住，外母又住得好近，所以成日一齊食飯，由細個唔識得珍惜，最好唔好叫埋我一齊食，因為覺得好悶，到依家想返屋企食飯，每次都有興奮、期待感覺，同屋企人食飯係最期待嘅娛樂，會好珍惜同家人相處重要性。」
子華稱：「我覺得電影有一種莫名其妙嘅溫暖，我會返屋企食媽咪煮嘅飯，最重要嘅係無論佢煮乜嘢，都唔可以彈，一定要食晒，一定要講好食，打包埋返屋企更好！」
Ivana也表示：「最開心嘅係我會同爸爸去老爺奶奶屋企打牌，食乜都冇所謂，最重要係食糊，我嘅技術係可以去到佢哋成日想搵我打！」
