《食腦喪B》首播|何廣沛變百變萬能喪屍 誤食豬腦中環周街闖  (15:10)

文章日期:2022年04月18日

由何廣沛、江嘉敏擔任男女主角,蔣志光、朱智賢、林凱恩、陳曉華、郭子豪、方紹聰、馬貫東等合演的喜劇《食腦喪B》,今晚(18日)首播。

《食腦》故事套路清晰簡單,主線或類似單元形式的小故事,均圍繞主角廢青「喪B」余陽光(何廣沛飾)發生。劇情講述喪B從澳洲工作假期回港後,身體突然出現異變,變成不死身的他,一味只想食人腦,而觸發點是一碗貌似「豆腐花」的「豬腦」。他的兩名好友法醫古德明(郭子豪飾)及道士華倫(方紹聰飾),則全力協助喪B「尋腦醫肚」免失控!除了「醫肚」,喪B劇中最大任務,是解開突然變異的終極謎底!

雖然「食腦」題材聽落恐怖,但《食腦喪B》卻是搞笑及溫情為主,皆因喪B除了主攻屍體腦袋「醫肚」免殺生外,均會為「捐腦死者」完成遺願!而喪B每次食完腦後,都必定坐擁死者生前記憶及特殊技能,並會先後化身彈琴達人、大隻佬及炒股王等,堪稱「百變萬能喪屍」,對於何廣沛來說亦可算是過足戲癮。

至於劇中演喪B家姐余晨曦叫大A姐(朱智賢飾),細妹余晚霞則叫C妹(林凱恩飾),三人加起來是「ABC」,如此組合未知是否有特別含義;三人由「阿Paul」馬辛勤(雪妮飾)一手湊大,婆孫之間的互動既搞笑又溫馨,亦是雪妮息影前最後一部作品。。

今晚(18日)播出的第一集,何廣沛已經有爆笑演出,劇情講述喪B因錯吃生豬腦後,見工期間突然扮豬叫,更在大街大巷爬來爬去。談到相關場口,何廣沛受訪時坦言印象深刻:「除咗扮豬叫,仲要喺中環趴喺條街度爬,嗰時仲要係朝早返工嘅繁忙時間,好多奇異眼光望住我,嗰個感覺唔似拍緊劇,我真係以為自己係一隻豬!雖然拍嗰時都算辛苦,但好彩出嚟效果幾好笑,都係值得嘅。」

提到與郭子豪及方紹聰因《食腦喪B》結緣成為好友,何廣沛大爆兩位好友私底下十分貪玩,曾試過趁其生日玩大整蠱,夾手夾腳叫江嘉敏幫忙「勾引」自己,說到此處方紹聰竟抵死搶答:「佢發現有鏡頭先清醒咋,如果唔係我哋都好難落台。」

(即時娛樂)