「浪浪送行者」被Alton善心感動:佢唔係為拍攝而拍攝… (16:22)

文章日期:2022年05月03日

由MIRROR成員王智德(Alton)主持的ViuTV節目《勁騎26》,昨晚(2日)播出第6集,Alton化身「浪浪送行者」義工,跟隨其他義工執拾在路上不幸往生的動物,並送牠們最後一程。節目播出後,不少網民在社交網洗版式留言嗌感動兼表示看到眼濕濕,他們感謝Alton和義工隊付出,令浪浪們有尊嚴地離開。

「浪浪送行者」的facebook專頁,昨晚還貼了一篇後記,版主表示今次跟Alton拍攝過程算順利,希望能感染更多人幫助在路上不幸往生的毛孩。

版主留言讚Alton克服心理障礙:「坦白講我哋係無諗過一個完全冇接觸過浪浪屍體、平時會怕污糟嘅Alton,去到求助現場時候,完全可以克服到佢心理障礙,而且仲主動落埋好多蟲嘅河幫手。」

版主在社交網貼了短片,原來當天拍攝結束後,發生一段小插曲,片中見有隻浪浪受傷躺在車來車往的馬路中間,而Alton在等候義工其間,默默站在浪浪身旁守護牠:「團隊同我哋喺善終公司分別20分鐘後,我哋收到Viu團隊電話求助。原來佢哋喺路上,咁啱遇到一隻狗比的士撞倒,前面已有一位先生停低咗車。因為人為嘅疏忽,狗狗突然衝出馬路,的士收掣不及。為咗避免其他車再輾過狗狗,團隊即時停車擋路,及打比我哋問可唔可以幫手。我們收到求助後,即時前往求助點。 

到達現場後,送行者阿峰即時搬狗狗到行人路上,而Alton即刻衝向送行者架車尾箱,拎所需要既Gear。當佢拎住浪浪送行者個箱跑返過嚟嘅時候,我好感動。因為Alton唔係為拍攝而拍攝,佢係牢牢咁將我哋接收往生浪浪所需要物品、程序一一記住。再落手幫手清潔,到最後知道所有嘢settle晒先離開。在此,我想再同Alton講一次,好榮幸你參與咗1日送行者工作,希望無嚇親你。」

相關新聞:勁騎26|Alton做義工為浪浪善終 送往生動物最後一程

(即時娛樂)