林日曦於演藝學院演出一連26場的舞台獨腳戲《大初戀日》，昨天宣布加開6月11日（星期六）下午3時一場，加場門票於明天（5月31日）早上10時公開發售。由於跟MIRROR演唱會門票同日開賣，有人問林日曦為何選擇同日售票，也有人問他可否推遲售票日子，林日曦今天在社交平台留言：「有啲人係咁問點解要同Mirror同一日賣加場飛… 答：因為唔係我選擇，係售票網分配俾我。至於有人竟然問我可唔可以推遲啲…唔好阻住佢買Mirror飛…」他便上載短片提供所有答案。片中的林日曦說：「有啲人係咁留言，話我點解要同MIRROR同一日開賣，就叫我『唔該你可唔可以推遲啲』，我心諗，首先第一，如果你淨係買MIRROR，唔買我嘅飛，咁我幾時開賣關你乜事。如果你淨係買我嘅飛，唔買MIRROR飛，咁佢哋幾時開賣又關你乜事。如果你兩個都唔買，咁更加唔關你事啦。如果你兩個都買嘅話，咁你過嚟買咗先啦，因為嗰邊你係買唔到㗎喇；或者你可以買咗嗰邊先，因為呢邊應該好晏都仲有飛賣嘅……」
