王祖藍為新節目碌盡人情卡 事後被嘉賓瘋狂投訴 (18:15)

文章日期:2022年07月23日

無綫首席創意官王祖藍主持的全新綜藝節目《有個閨密叫祖藍》,將於本月31日(周日)首播。祖藍為節目碌盡人情卡,請來8位好友現身,包括炎明熹、苑瓊丹、蔡少芬、胡杏兒、薛凱琪、容祖兒、楊千嬅及陳松伶。8人因不同原因與祖藍成為「閨密」,她們與祖藍的共通點是「夠晒無聊」,小小事也可以玩得非常開心。

為了讓8位嘉賓傾得盡興、玩得過癮,祖藍刻意將拍攝日程安排得「有咁忙得咁忙」。每集嘉賓除了要完成指定的「閨密任務」,更要按節目組及祖藍心情額外被加碼其他小遊戲,當中有小學雞級別的、「互相傷害」Mode、「真情」Mode、烹飪鬥室及時光倒流情景題等,務求讓觀眾及嘉賓每一刻都有驚喜。

祖藍受訪時說:「拍呢個節目真係好忙,都辛苦節目組度咗咁多嘢出嚟。最搞笑係每個上完嚟嘅嘉賓都向我投訴:『乜唔係上嚟傾偈咋咩?點解忙得咁緊要?好攰呀!』」祖藍在宣傳片中與女嘉賓有不少親密接觸,他被問到可擔心激嬲太太李亞男時說︰「我老婆識咗我咁耐,都知我真係有唔少異性好友,但佢相信我係清白嘅。不過,佢為咗安心起見,都喺節目一開始透過節目組同我約法三章,仲定埋『三不規條』,係咩就唔講住,大家睇第1集就知,亞男同我囡囡都會不時喺節目『客串』。」

祖藍表示拍攝過程中最令他驚喜的,是得知有些閨密的心事。他說︰「好似第1集嘉賓蔡少芬,原來佢嬲過我嘅,但我當時真係完全唔知,我事後聽番都覺得自己好過分。」

(即時娛樂)