陳安立（Brian）和未婚妻林希靈今天（23日）現身「健康博覽2022」，陳安立笑言今次是「最後一次」以情侶檔搵銀，他解釋：「因為下次就係『夫妻檔』，希望婚後都會密啲一齊開工，其實我係畀希靈呃咗，因為佢話佢超鍾意運動，點知拍拖後，先知佢咁懶。有一次同佢跑馬拉松，希靈去到最後階段想放棄，我即時喺佢耳邊唱『紅日』幫佢打氣，成功激嬲佢跑快啲。」
林希靈表示Brian歌喉似技安，禁止老公婚禮獻唱：「因為太多人婚禮唱歌走音，畀人拍晒上網周圍傳，我唔想畀人笑，所以唔准唱歌，依家距離婚期仲有1個月，我哋仲未派帖，搞到啲朋友以為我哋唔請佢嬲咗我哋。」
講到婚禮兩公婆眉飛色舞，希靈表示朋友介紹偏方「教生仔」：「佢哋話『潤滑劑』可以揀生仔定生女，依家成班補藥黨咁Sell我，陳生話想要兔年BB，本來都不以為意，點知計數下年就係兔年，我怕我生唔切咋！」
