張敬軒在上月的英國倫敦演唱會首唱黃偉文（Wyman）填詞的新歌《隱形遊樂場》，經Wyman連續10日在社交網出Post催派歌後，歌曲終於今天（20日）正式上架。《隱形遊樂場》在倫敦錄製，MV亦在當地拍攝。軒仔表示在當地拍MV既是意外亦是最好的安排︰「原本完咗演唱會後，打算同爸爸媽媽去法國旅行放假，但爸爸媽媽身體唔舒服，突然間我又塞咗喺倫敦。因為團隊改唔到機票，得我同攝影師留喺倫敦籌備MV。反正成件事已經係一個遊樂場，我一定要落場玩每個『攤位遊戲』，所以自己做埋art team，搵咗我老朋友Queenie Yu做art director、做styling。我又做埋監製、聯絡當地拍攝團隊、演員、搵景、美指、木工道具、為眾人訂午餐。最癲係我嘅photographer Kiko，佢未做過MV導演。我問：『喂，Wyman x 張敬軒呢單嘢，你有冇膽做先？』佢擘大口得個窿。我話其實個flow就係咁，呢幾年我哋嘅生活、所有嘢就係unexpected。」
