肥媽（Maria Cordero）、李家鼎（鼎爺）及游嘉欣主持的全新飲食節目《肥媽李鼎》明晚（24日）首播。肥媽以「平靚正快」見稱，鼎爺則擅長細緻的傳統功夫菜，兩人首次合作，每集會配合不同主題，一邊煮餸一邊交流「八卦經」。第1集的主題是「廚神的誕生」，兩人將分享他們如何走上廚神之路。肥媽透露源於一味「煎封鯧魚」︰「嗰時好興私房菜，有人叫我去睇吓人哋點煮，幫手做吓介紹，點知去到等咗兩個幾鐘，佢話要等工人返嚟先煎得，我就話我幫你煎啦。佢問我得唔得㗎，我就話邊個阿媽唔識煮飯。跟住我對住鏡頭一路煎一路講一路食，煮完拍出嚟好受歡迎，之後就煮到依家！」
