無綫新劇《靈戲逼人》明晚（3日）首播。《靈》除了張振朗和龔嘉欣的人鬼戀，還有阮浩棕、劉穎鏇和吳子冲3位年輕人創立粵劇戲班追夢的勵志劇情。阮浩棕在劇中會擔任文武生，大曬粵劇功架。他透露有特意上堂學習粵劇基本功︰「慶幸現場有心姐（謝雪心）可以請教，劇組亦有搵嚟一位文武生到現場幫忙指導。好記得其中一場大戲場面，呢位文武生讚我有天分演到大戲嘅味道，嗰刻都幾有成功感！」繼在《隱門》與劉佩玥演情侶，阮浩棕今次在《靈》中與劉穎鏇飾演一對。談到與劉穎鏇合作，他說︰「最初覺得佢唔係好講嘢有啲高冷，後來發現原來只係佢怕凍，喺廠入面凍到唔願出聲！」
劉穎鏇劇中飾演二幫花旦兼動作替身演員，她坦言事前從未接觸過粵劇︰「從來冇想像過自己會演粵劇，事前專誠搵唱開大戲嘅Auntie請教唱粵劇腔同動作，現場亦有師傅指導我嘅動作，希望盡量模仿到個神韻。每次整頭加化妝都起碼要兩個鐘，唔單止化妝好特別，就連黐頭髮都好得意，會用一啲植物去整到個假髮好黏。其實落妝都唔太難，但要慢慢咁捽走啲色。」提到劇中動作場面，劉穎鏇說︰「相比之前嘅埋身打鬥，今次主要係挑戰揸住劍嚟打，都有一定難度。」
