電影「失衡系列」終章《失衡凶間之惡念之最》後天（27日）上映。電影由3個短篇組成，其中《死亡回憶》，陳湛文飾演想成為導演的人，柯煒林（Will）飾演非常執着的編劇。兩人是一件衫兩份穿的死黨，對電影充滿熱情，誓要拍出好戲，卻多年也混不出來。直到在片場上遇到欺善怕惡的衰導演周祉君，令他們決心做出自己作品，甚至為取得靈感，更不惜動殺機。豈料一次意外，陳湛文誤將Will殺死，然後偷去對方作品當上導演，飛黃騰達。
其中一幕陳湛文、柯煒林及周祉君於片場一言不合，大打出手，雖然鏡頭前拳拳到肉，箍頸、揮拳樣樣齊，其實虛有其表。陳湛文笑說：「我哋呢場打戲，唔使武指出手，我哋都惜住大家，打得好斯文，好似打啲細路仔交咁！」周祉君笑言甫見Will就好嬲，妒忌他戲中有一把長秀髮，自己卻超高髮線造型，還指住自己額頭扮嬲：「點解我對佢有團怒火？睇下，即刻比下去呀！」
另一場戲，柯煒林力戰逾200磅的士司機「肥哥」，2人扭打一團，他大力出拳打到對方身上，又嘗試推開對方都不成功，似乎很吃力。他說：「我冇乜打鬥戲經驗，多謝導演、武指教咗我好多嘢。最後，當『肥哥』責落我身上嘅時候，佢個頭好貼近我，呢個經歷幾有趣。不過只限拍攝效果，現實生活唔想有呢啲有趣經歷。」
《惡念之最》是恐怖懸疑戲，陳湛文表示喜歡看這類型電影：「心情畀個劇情吊住吊住，但你又想用腦估發生咩事，非常引人入勝。」周祉君認同：「我都好鍾意睇呢類電影，好想睇到底喺我哋身處嘅呢個社會入面，可以有幾咁扭曲，而又好吸引人嘅故事。」Man爆的Will原來害怕看恐怖片，更自認是「淆底獸」，今次拍攝是挑戰他膽量。他說：「懸疑推理電影勉強OK！呢套戲先講咗結局，然後抽絲剝繭講番件事點發生，以前揭尾故類型嘅遊戲，我係全部唔敢玩。我淆底，我係淆底獸，我驚！」
