女團COLLAR成員Marf（邱彥筒），繼早前推出首支個人單曲《*~Silencio…Shh》後，昨日再推出今年第2首單飛作品《fOoL##》，新歌注入不少個人元素，包括MV構思、服飾等，不過最叫Marf感興奮，莫過於她找來陳蕾為歌曲作詞，促成2人首度合作。
Marf盼透過《fOoL##》宣揚「儍人是福」信息，以簡單方式得到快樂，Marf表示：「其實今次idea係點嚟呢？我有一個好鍾意嘅外國女歌手Madison Beer，佢有首歌都係叫《Fools》，但佢首歌係講愛情上愚蠢嘅人，而我今次構思呢首歌，一來係出於私心我鍾意佢首歌，二來係我生活、想法及價值觀，愈來愈變得儍子嘅方式，即係有啲嘢睇到扮睇唔到，令到自己過得好啲，亦係令自己更加快樂嘅方法，好想透過歌曲宣揚呢種生活態度。」
Marf親自請來陳蕾填詞，2人首度合作一拍即合，Marf說：「同陳蕾溝通好多之後，歌詞出到嚟，絕對係我非常Expect嘅嘢，而佢都開心同滿意。」問到Marf跟陳蕾有何淵源？她笑說：「其實私下跟陳蕾冇太多聯絡，間中會傾偈，但我近期好鍾意佢嘅歌，尤其《伸縮自如的愛》，呢首歌嘅歌詞、感覺係我好想做到嘅嘢，所以我膽粗粗喺Ig問對方有冇興趣合作，其實我都知佢幫人寫歌有少少壓力，所以我都話『我唔係迫你，你睇下有冇興趣，如果聽到個Demo有Feel，可唔可同我一齊做呢件事』。」
MV拍攝當天，正值35度高溫，Marf跟一眾工作人員烈日下大汗疊細汗，Marf表示愧對大家：「今日係我第一次喺夏天戶外拍攝，當到達拍攝現場，感覺有啲愧疚台前幕後嘅團隊，因為見到個個都流晒汗，第一個鏡頭就係拍跳舞，朝早起身，食少少嘢就要跳舞，烈日當空，真係好辛苦，相信太陽伯伯嘅美麗，對今次MV會有幫助。」
MV還要到郊區取景，Marf笑言要驅蚊兼防曬：「可能啲蚊都覺得我啲血㷫嘴，都冇再叮我，在拍攝中途都放棄噴蚊怕水，但就不斷噴防曬，雖然我係鍾意曬太陽，但我唔想有兩截色，所以我畀大家更努力咁補防曬。」
