炎明熹（Gigi）10月於Star Hall舉行《炎明熹Gi-FORCE演唱會》，10月7日場次的門票今早10時開賣，11時半全數售罄。Gigi知道後心情興奮，她說︰「我前一晚仲緊張到瞓唔着，真係冇諗過反應咁好。開賣冇幾耐，我已經不斷收到歌迷喺社交網站私訊我話買唔到飛，好唔開心。」據知，有黃牛黨聲稱手持前排靚位門票，歡迎私訊了解詳情及售價。Gigi知道後即時向公司反映，主辦單位隨即宣布加開10月8日終極尾場。
Gigi表示︰「之前睇啲前輩歌手開演唱會嘅報道，佢哋會煩惱歌迷買唔到飛，又會心痛佢哋幫襯黃牛黨。我依家終於身同感受，好多謝公司配合，好快應承加多一場，但因為場地問題，唔可以再加。我想喺度呼籲我嘅歌迷，真係唔好幫襯黃牛黨，希望加場之後，大家都可以買到飛。雖然加場令自己壓力大增，但為咗答謝歌迷，我會盡最大努力，好好完成兩場演唱會。正如我前日喺記者會上講，只要我攞起支咪，就會珍惜每一次演出，唱好每一首歌，為咗多謝歌迷嘅支持，我會雙倍畀心機。」
10月8日的加場門票已於今日下午2時開售。
