無綫《思家大戰》將於周日（5日）晚播出新一集，周秀娜率領的「叠影狙擊」隊對戰鄧梓峰率領的「台慶MC」隊。周秀娜透露她將在台慶劇《叠影狙擊》中分飾兩角，黃浩然則自爆是大反派︰「我同娜姐對手戲比較多，表面上好似利用佢，但中段會慢慢鍾意咗佢，所以拍攝時要揣摩一吓。」郭政鴻透露《叠》劇有不少反派角色，他在戲中與關禮傑飾演兄弟，有不少衝突場面。
主持李思捷表示花了3季時間才請到鄧梓峰上節目。鄧梓峰笑說︰「兩個原因，第一我要諗著咩衫上嚟，呢個諗咗年幾；第二我要睇好多集先，要知道點玩先夠膽上嚟，即係好似我讀書咁，我要留幾年班先夠膽考會考！」黎芷珊開心表示做台慶主持有靚衫著，李思捷聞言說︰「你真人同上鏡都咁靚，我細細個就睇你﹗」黎芷珊立即扮嬲指着李思捷︰「你係咪要講細細個呀？」
問答環節上，周秀娜回答問題「有一個相同性別孖生兄弟姊妹嘅好處」時稱「可以頂替對方」，李思捷聞言問︰「你喺劇入面係咪咁？」周秀娜笑答︰「唔係，但我哋Share男朋友用！」鄧梓峰更表示︰「追同一個女仔，邊個得閒邊個去！我都有一對孖仔，呢樣佢哋冇話畀我聽，我估啫！」
