踏入5月，江若琳（Elanne）在社交平台透露上月經歷了一次大考驗，丈夫蕭唯展（Oscar）不在家時，兒子立鈞（Owen）及其中一頭愛貓「金寶湯」同時病倒發高燒。
她說︰「再見了4月，一個令我突然長大的月份，一直我都覺得金寶豬強壯到我從來唔使擔心佢，點知佢突然病倒了，突然間發高燒，完全無諗過平時嘅百厭星病到要住院，心痛到一個點，仲要撞正佢發燒時bb包同日都40度高燒，繼續心如刀割。我亦做好半夜飛車去醫院嘅準備，兩兄弟同病相憐。咁啱呢個艱難嘅時間，先生出差新加坡，我不知哪來嘅勇氣，由一個雪凍咗車牌多年同揸車一直零自信嘅人，喺呢段時間每日奔走港九新界，突然變咗一個車手。我真真正正感覺到做母親嗰種神奇力量！幸好依家兩個仔都無事了！你哋唔好再嚇我啦 ！乖啦！你哋健康我就安樂㗎啦﹗依家我幾窄嘅停車場都泊到。原來bb高燒即刻沖涼有用。如何幫貓探熱變成了專家。5月一切都會很好﹗」
Oscar留言讚老婆︰「你成熟了，以後頭家就交畀你﹗」
