鄭丹瑞（旦哥）和盧慧敏（Amy）主演的電影《得寵先生》，昨天（7日）獲旦哥好友連炎輝包場，並邀請劉家豪與太太梅小青、盧敏儀、羅蘭、余慕蓮、吳麗珠、譚玉瑛、黃允財、杜燕歌等好友捧場。開場前，旦哥親自招待並入場謝票，他坦言最開心邀請到前輩劉家豪入場，為自己初入行拍劇被嫌「戲屎」平反。他說︰「今日好多前輩嚟捧場，最開心見到劉家豪先生和小青姐，我同家豪哥有段恩怨，所以特別點名邀請佢嚟睇戲。話說我入行喺麗的電視接到一個劇本《新大丈夫》，演林嘉華細佬。當時由劉家豪編導，我拍咗3集之後冇再接到劇本。劇組話我太高，麗的嘅布景太矮，成日穿崩，我信咗！我追問後，佢哋話：『劉家豪話你啲戲屎呀！』呢件事擺咗喺度幾十年。」
