林峯同期出道極速上位 徐榮受挫:大家差不多之嘛

文章日期:2022年05月01日

【明報專訊】徐榮憑無綫處境劇《同事三分親》、《愛.回家》入屋,入行22年,演出逾百部無綫劇集,他接受娛樂新聞台《星光路上》訪問,與主持潘盈慧分享入行經歷及多年演藝路的苦與樂。徐榮入行前做過廚師、司機、水喉工等,後因失業決定投考藝員訓練班,當時同學有林峯、楊茜堯及楊明等。

稱6歲包包非常貪靚

藝訓班畢業後,徐榮由低做起,演過無數閒角,眼見林峯極速上位擔正主角,令他自信心受挫,「頭兩年我都覺得要做吓閒角,去到第3年開始有挫敗感,我同阿峯差不多之嘛,大家個名都是兩個字」。徐榮感氣餒進入「憤世期」,幸當時學會調整心態,就算演村民甲乙丙都非常積極,「導演見到做村民都咁積極,就叫我不要太大反應,驚我搶過前面主角」。

徐榮捱過「憤世期」,最終獲監製及無綫高層賞識,苦等8年終有機會演出《同事三分親》,憑「裘俊」一角入屋,並於《萬千星輝頒獎典禮2008》首度提名最佳男配角及飛躍進步男藝員。自此打開徐榮的處境劇之路,2012年接拍《愛.回家》,劇中「馬強」好好先生角色深入民心,「《愛.回家》拍了4年,發生好多估不到的事,好似女兒有份拍」。他笑言現時6歲女兒包包非常貪靚,每當看回自己在《愛.回家》演出時,嫌棄當時很肥,好搞笑。

娛樂組