男團ERROR成員郭嘉駿（193）昨天（14日）35歲生日，外公在他生日前夕離世，令他十分傷心。193昨天在社交平台分享小時候與外公的合照，他說︰「我細個有段好長嘅時間都係公公婆婆湊我，因為爹哋媽咪日頭要返工，所以我每日放學都會去公公婆婆屋企，到食完晚飯先跟爹哋媽咪返屋企。以前一直都覺得公公好犀利，到咗呢個年紀都仲可以身體咁健康冇病冇痛周圍走，個腦仲係轉得咁快可以睇財經炒股票，但係近一兩年佢身體狀況突然急轉直下。以前每次上去佢屋企食飯我都食好多嘢，因為佢煮餸嘅味道出面係食唔到；以前每年新年都好期待食到佢親手整嘅蘿蔔糕，因為好足料好好味同出面買嘅蘿蔔糕根本冇得比，但係近年因為佢身體狀況越嚟越差，所以已經好耐冇食過佢親手煮嘅嘢食。不過食唔食到都係其次，大家都覺得佢身體健康先係最重要。」
