【明報專訊】Mama後生時，都算係半個文青，鍾意約朋友睇吓話劇，沾啲文藝氣息。但自從生咗小朋友，就好少再入劇場啦，因為真係好難帶小朋友一齊睇話劇。你諗吓，佢哋點可能喺一個漆黑嘅劇場坐足兩個鐘，聚精會神睇話劇呢？隨時睇到一半，扭計要走，咁就失禮又無癮啦。
之前Mama個朋友Shiona Carson搞咗一次幼兒英文劇，係咁叫我捧場，仲話套劇嘅主要對象係6個月至3歲嘅幼兒。我心諗班豆釘咁細個，唔怕佢哋啲喊聲反轉個劇場？Shiona本身係「香港小莎翁」劇場藝術總監，不過佢哋今次唔講莎士比亞嘅故事，反而創作咗第一套幼兒英語劇Hubbub。佢哋咁有心，Mama就一於現身支持。
現場見到嘅都係媽媽同年紀較細嘅小朋友，果然不出我所料，環境唔熟悉又黑麻麻，一開始就喊聲不停。不過工作人員好貼心，安排大小觀眾坐喺膠軟墊上面，周圍仲有唔同嘅公仔同咕𠱸圍住，畀小朋友好似返playgroup咁樣，等小朋友稍為放鬆，唔好咁緊張。
過咗一陣，4個演員開始表演，初初一齊哼兒歌，帶動小朋友投入演出，後來開始講起簡單嘅對白，每個演員各自重複一個英文單字：「small、big、old、new」，佢哋透過唔同嘅道具、肢體動作、光影投射，令小朋友認識呢4個英文字嘅分別；演員仲會走入觀眾群同小朋友互動，引起佢哋嘅興趣。Mama覺得，場內小朋友最開心係光影投射環節。演員企喺布幕後，做出唔同嘅得意動作，就好似皮影戲，小朋友睇到哈哈大笑。中途更有演員走到觀眾群中吹波波，令成班小朋友一齊伸手篤波波，忘記入場時嘅恐懼。成班細路跟住啲大哥哥大姐姐一齊玩、哼兒歌，不知不覺話劇就完結，小朋友玩到唔捨得走。
咁好玩，Mama梗係要同Shiona傾幾句。佢話之前同劇團一齊去南非開普敦參加藝術考察團，受到當地幼兒劇場啟發，所以返香港之後，便着手創作呢個劇。今次結合音樂、影子、即興互動創作等元素，目的係開拓小朋友不同嘅感官領域，享受劇場初體驗。講真，Mama未入場前都半信半疑，但係睇完之後，完全覺得呢次體驗非常值得推廣，大人小朋友一齊走入劇場，令話劇唔再有年齡限制，更加可以從小培養小朋友嘅興趣，開拓佢哋嘅視野。
[Happy PaMa 教得樂 第168期]
