【明報專訊】俗語說：養兒一百歲長憂九十九。Mama自從有咗兩個豆釘後，成日擔心佢哋食唔飽、著唔暖，仲要教功課、照顧起居飲食，已經好辛苦；不過打開報紙，見到有特殊需要小朋友嘅家長專訪，我會不期然肅然起敬，相信佢哋花嘅心機、耐性更多。前幾日Mama同幾個老死，拋低班豆釘畀老公，走去睇4月上映新戲《黃金花》的優先場。電影講述女主角黃金花（毛舜筠飾）同中度智障兼患有自閉症囝囝光仔（凌文龍飾）嘅生活，道出照顧有障礙囝囡嘅辛酸。Mama感動到喊咗幾次，仲聽到戲院有此起彼落嘅索索聲。
完場後有個電影分享會，Mama留低聽吓導演陳大利分享。佢話5年前已經開始構思電影，一直都想寫個關於母親嘅故事，但苦無靈感；後來有日記起自己住嘅屋邨，有個媽媽成日拖實有自閉症嘅囝囝追巴士，呢個畫面令人深深感動，決定以佢哋為藍本。
當導演開始着手寫《黃金花》，收集好多意見，過程中發現自閉症小朋友世界好唔同，照顧佢哋有好多禁忌，導演好擔心自己處理唔好呢個主題，甚至令觀眾有誤解。所以開拍前3至4個月，佢就約埋毛舜筠同凌文龍，去到兩個有自閉症小朋友嘅家庭，分別是余大俠同家俊媽嘅屋企，深入訪談，相處一段長時間，成個團隊去體驗呢兩個家庭嘅艱辛。另外喺拍攝過程，其中一個家庭嘅爸爸余大俠，更加在場指導男主角如何演得更加入型入格，導演都好感激呢兩個家庭嘅幫助。
演員導演親訪患者家庭取經
分享會完咗後，Mama知道余大俠都有到場，即刻捉住佢傾咗陣。佢就話電影裏面嘅光仔就係取材自佢囝囝，阿囝高佢半個頭，成200磅，成日又跑又跳，自己同太太年紀開始大，照顧好吃力。不過佢就話，照顧囝囝都唔算最辛苦，但有陣出街時佢跑來跑去，引來好多奇異眼光，有時都會幾難受。所以佢好感激導演，拍咗呢套戲，希望觀眾日後對有特殊需要嘅小朋友同屋企人少啲歧視，多啲體諒。
[Happy PaMa 教得樂 第178期]
