有話說﹕周末好玩滿fun推介

文章日期:2018年3月13日

【明報專訊】Mama一對小朋友讀緊嘅學校,一個學年有三次考試,佢哋上個星期考完試,大人細路都筋疲力盡!不過,Mama絕對唔係怪獸家長,努力後應該畀機會佢哋放任咁去玩!但係距離復活節假期仲有兩個星期,呢個周末有啲咩好做呢?不如推介兩個好玩嘅活動畀大家啦!

相信好多爸媽對智樂遊戲日唔陌生,每次佢哋都有好多得意遊戲,小朋友玩到唔捨得走!而呢個周末開始,一連兩個周六日智樂會喺銅鑼灣香港花展裏面舉辦遊戲日,到時有小小木匠師、任玩汽水箱、車軚陣等非一般遊戲,而冇出現一排但好受小朋友歡迎嘅禾稈草地帶亦會再度登場,小朋友可以自由設計玩法,就算只係瞓喺禾稈草堆上面望住藍藍天空,已經好relax喇!

創意市集變廢為寶

另一個好玩活動就係建造業議會同零碳天地合作嘅嘉年華會,將環保元素注入各種文藝活動,包括文創市集、升級工作坊、音樂會等,其中「綠‧趣遊樂場」將廢物搖身一變成為十幾個遊樂設施同遊戲攤位,包括由以環保紙製作嘅「環保城堡滑梯」、「蘑菇層層疊」等遊樂設施;曾於米蘭、柏林、首爾等地參展和奪獎的環保設計師張瑋晉(Kevin)又會將舊雨傘支架、廢膠箱、舊喉管等變成再生大型樂器Umbrella Piano、膠樽鋼片琴、膠桶結他等,畀大家一齊合奏美妙樂韻。今個周末,唔好再話搵唔到節目去玩喇!

■智樂遊樂車之賽馬會社區綠化遊樂場

日期:3月17、18日及24、25日(周六及周日)

時間:上午10:00至下午5:30

地點:銅鑼灣維多利亞公園大草地

費用:香港花卉展覽2018之項目之一,凡購票入場者,即可免費參與

■建造業議會.零碳天地——愛海行動嘉年華

日期:3月17、18日(周六及周日)

時間:下午1:00至晚上6:00

地點:九龍灣常悅道8號建造業議會.零碳天地

費用:免費

[Happy PaMa 教得樂 第181期]

明報影片