有話說﹕不貧窮藝術節 讓藝術走入生活

文章日期:2018年05月08日

【明報專訊】今個星期日就係母親節,Mama揀咗一個特別節目,等媽媽同小朋友過一個不一樣嘅周末。

為好創作提供平台

Mama見到一個有關「不貧窮藝術節」嘅宣傳單張,藝術節就聽得多,但咩叫做「不貧窮」呢?查探之下,原來係由台灣高雄市創辦嘅節目,為當地年輕藝術家提供一個表演平台,不限年齡、經驗,獲甄選表演者毋須付費,就可得到場地同行政支援去表演,做到真正「讓藝術不貧窮」。呢個節目喺當地已經做咗3屆,而今年香港非牟利劇團三木劇作,就舉辦屬於香港嘅第一屆不貧窮藝術節,為期大約一個月,節目包羅萬有,當中有適合親子嘅活動。

三木劇作藝術總監林倩嬌(Cathy)話,劇團曾應邀到高雄參與第三屆「不貧窮藝術節」論壇,對藝術節氣氛同年輕人嘅衝勁深受感動,決定將藝術節由台灣帶到嚟香港。

入場門票自由定價

相比台灣,香港「不貧窮藝術節」對年輕藝術家嘅層面限制更少,只要有好創作,任何年紀嘅藝術家都有機會發聲,而活動票價不過係$80或自由定價(觀眾自行決定付費),甚至係免費,收得款項全歸於藝術家。「好多人以為藝術係好高端、好昂貴,我哋就係想拉近大家嘅距離,所以今次好多活動都會安排喺唔同社區場地,等大家知道藝術就是生活。」

戶外故事坊 同舞同唱

今個星期六(12日),「不貧窮藝術節」會喺塔門舉辦5場活動,當中包括適合親子參與嘅故事坊,由故事媽媽CanCanMa喺塔門一個教堂同大家講故事;仲有由舞蹈家兩口米主持嘅盛夏舞誌,大人細路都跳得;大家仲可以帶一件樂器甚至可發聲物件,齊齊玩Free Jam Party!

為配合活動,當日來往由西貢黃石碼頭至塔門嘅街渡會加密至30分鐘一班,想喺戶外感受一下藝術嘅氣息,就唔好錯過啦!

■活動詳情:www.aboutthreewoods.com

[Happy PaMa 教得樂 第189期]

明報影片