有話說﹕街市剩食變身愛心靚湯 - 20180522 - FAMILY - 明報OL網

有話說﹕街市剩食變身愛心靚湯

文章日期:2018年5月22日

【明報專訊】好多富裕國家浪費食物嘅問題相當嚴重,美國、法國、日本,每日都有大量被棄置嘅過期食品同廚餘,好多環保團體諗盡方法去減少大嘥行為帶嚟嘅壞影響,例如法國就禁止大型超市丟棄或銷毁未過期嘅賣剩食物,並建議轉贈慈善機構。

回收安檢成免費慈善餐

Mama都成日教仔女唔好做大嘥鬼,出街食飯「食得晒先至好嗌」,但係有時喺屋企煮飯,少不免會剩番啲廚餘,都覺得有少少浪費。其實本港好多機構都好努力宣揚珍惜食物嘅理念,好似食物回收及援助計劃「惜食堂」,團隊會向本地飲食界回收仍可安全食用嘅剩餘食物,通過嚴格嘅食物安檢程序後,再經中央廚房烹煮成營養均衡嘅熱飯餐,由物流團隊免費派發畀社會上需要食物援助嘅人,真係好有意義。

名廚義賣 捐10元即歎

我哋想唔亂嘥食物,仲可以做啲咩呢?今個月領展有一個「盛湯廚房」活動,大家都可以參與㗎!活動中名廚王凱傑(Jason Wang)會利用喺領展街市商戶回收嘅食物同埋其他新鮮食材,設計4款靚湯,喺周末以義賣形式出售,為惜食堂籌款。大家只要喺「盛湯廚房」捐款箱捐10元或以上,就可以得到換領券一張,換一碗湯滋潤一下,捐款金額將全數撥捐惜食堂呢!

包裝上畫畫寫字傳心意

眨吓眼,活動只剩番今個星期六、日(25、26日)分別喺鯉魚門廣場同蝴蝶街市舉行;下午3至5點,小朋友仲可以利用現場提供嘅顏色筆,親手喺靚湯包裝上寫上畀家人嘅句語,表達心意。事不宜遲,記得呢個星期六、日去買番碗有意義嘅愛心靚湯啦!

網址:linkhk.com

[Happy PaMa 教得樂 第191期]

明報影片