【明報專訊】睇課外書都學到文法詞語
一年一度香港書展聽日就開始啦！就算今時今日個個拎住手機同平板電腦，其實仲有唔少小朋友鍾意睇書，所以書展年年都仲係咁逼咁熱鬧，而且出版界亦不斷有新書推出，對家長同老師嚟講，是一件好事！
小朋友固然有佢哋鍾意睇嘅書種，細啲嘅可能會睇來自唔同國家嘅繪本、小學生又會鍾意睇推理小說、偵探故事；大個啲，又會睇吓經典文學作品等等。不過以Mama每年逛書展所見，最受家長「歡迎」嘅攤位，往往擠得水泄不通，仲要大排長龍先畀到錢。大家都可能估到，就係賣補充練習嘅攤位啦！
唉，都已經暑假啦，唔通個個小朋友都仲想「補充練習無間做」咩！Mama覺得平時功課甚至去吓補習班，所做嘅「練習」都已經好足夠，有時睇吓課外書，除咗消閒、吸收知識，其實係可以學到文法、詞語同埋閱讀理解㗎，使乜靠做補充練習呢？
爸媽睇好書 做孩子榜樣
其次，家長其實可以喺書展搵到適合為人父母細閱嘅書。Mama八到，今年有幾本書好啱爸媽，包括集合9位媽媽故事嘅《有時是愛，有時是忍耐——全職媽媽的故事》（作者梁小島）、由協康會職業治療師團隊將多年累積嘅臨牀經驗結集成《拆解孩子的感覺密碼——認識感覺訊息處理困難及相關的支援策略》，仲有陳美齡記述喺唔同國家視察時嘅親身經歷嘅《我們都是地球人——被遺忘的孩子》等等，呢啲書或者會令作為父母嘅你同我有得着。係時候放低手機聞下書香，小朋友都會以你做榜樣㗎。
[Happy PaMa 教得樂 第199期]
