【明報專訊】Mama作為家長，遇着兩隻化骨龍放暑假，真係比平時忙十倍！點解咁講？因為暑假實在太多有趣嘅活動啦！就算唔報興趣班、唔出埠旅行，玩樂時間表都可以排得滿滿！唔信？Mama隨口就可以介紹兩個免費又好玩嘅活動畀大家！
體驗織布刺繡過程
第一個係紡織主題親子活動「盛夏手作：來建紡織村」，荃灣南豐紗廠六廠紡織文化藝術館舉行，係咪好新奇呢！呢個活動可以畀小朋友親身動手，試做紡、織、染及刺繡布藝，例如以刺繡技術為手帕加添裝飾，喺村屋體驗各種紡、織、染製作過程等等，部分活動仲免費又唔使報名，真係好方便又好玩。
得意泡泡互動裝置
另一個PMQ元創方舉行嘅「泡夏泡夏」互動裝置及遊樂園，現場擺設咗60個泡泡裝置，其中一半泡泡會自動旋轉，另一半則歡迎大家用手轉動棒子，等泡泡緩緩綻放，效果勁得意；仲有唔同嘅工作坊，如綠腳丫、PMQ和mudwork為大家籌劃親子木工班，想參加就記得報名先啦！
[Happy PaMa 教得樂 第200期]
