有話說﹕愛心暑假 為獨居長者做中秋手作

文章日期:2018年08月07日

【明報專訊】Mama七月初帶咗一對囝囡去工業福音團契搞嘅「夾縫體驗行」,當日有好多體驗活動,用遊戲形式畀小朋友體驗一下基層人士嘅生活困難,輕鬆形式加上義工詳細嘅debriefing,小朋友真係對社會議題有更深刻嘅認識。

一齊做義工了解社會

體驗行要等下年先再機會參加,但Mama好贊成爸媽用不同方法,從細培養小朋友關愛社會嘅心!例如可以同佢哋睇多啲新聞,了解社會發生嘅事情,或者一齊做義工,真正接觸有需要幫助嘅人。Mama知道有啲爸媽擔心小豆丁比較細,未有心理準備去做探訪義工,Mama就搵到一個義工活動可以畀家長同小豆丁嘗試踏出第一步!

連場親子義工活動

就嚟到中秋節,香港基督教服務處正舉辦「中秋創藝傳關懷」手工創作義工服務,爸媽可以趁暑假同小豆丁一齊喺屋企做慶中秋嘅手作,然後交由服務處轉贈畀獨居或非活躍長者。爸媽可以同小朋友仔細解釋做手工嘅目的 ,等佢哋知道有啲公公婆婆可能要孤獨度過中秋節,而親手做嘅小手工就可以送上祝福與關懷!

不過要留意,參加呢個活動之前,首先要以每月定額捐款50元成為「希望小天使」,之後就記得喺8月26日或之前登記參加「中秋創藝傳關懷」,並於9月3日或之前郵寄或親身交作品去「希望小天使」秘書處,佢哋就會於節日前將你哋嘅作品送到公公婆婆手上㗎啦!做咗「小天使」之後,仲可以報名參加不同嘅親子義工活動,好似長幼同樂日、上門探訪隊,除可以幫小朋友建立良好品格同價值觀,亦可以幫爸媽同囝囡建立更緊密嘅親子關係。

[Happy PaMa 教得樂 第202期]

明報影片