【明報專訊】運動熱潮一浪接一浪，上個月世界盃先啱啱完結，今個周六亞運又開鑼！你哋有無趁暑假去做下運動呢？𠵱家天氣熱辣辣，Mama屋企兩個細路聽到去游水就最開心。
六成港孩運動不達標
Mama八到，小朋友做得運動多真係會開心啲㗎！香港小童群益會今年4月發表咗「運動與快樂——香港兒童快樂調查2018」，調查話兒童每星期做中等至劇烈強度運動（註）時間較長，或者達到世界衛生組織建議水平嘅兒童，快樂程度會較高。
世衛建議，5至17歲的兒童及青少年應每日做最少60分鐘中等至劇烈強度運動，但調查發現有六成受訪小朋友未達標，而阻礙運動嘅主要原因係學習。梗係啦！香港小朋友學業咁繁忙，連暑假都要去補習班，點會有時間做運動？小童群益會執行委員會主席吳彥明醫生就建議，家長應該喺運動同學業之間取得平衡，避免興趣班、補習班充塞子女嘅課餘生活。
佢哋仲建議家長，安排子女生活作息時同佢哋多加溝通，加入運動時間，而且根據小朋友嘅興趣去揀，佢哋鍾意先會做得起勁㗎嘛！Mama以前都好想個仔做籃球明星，好似《男兒當入樽》嘅櫻木花道咁型，結果佢鍾意打排球，但見佢玩得咁開心，我都好支持㗎！
家長以身作則最重要
鼓勵小朋友做運動，最重要係家長以身作則一齊做，所以Mama一家四口不時去打羽毛球，開心又健康，仲可以促進親子關係，咁就一次過滿足到幾個願望啦！
■註：
中等強度運動（Moderate physical activities）：指會讓你呼吸比正常費力一些的體能活動，例如以正常的速度踏單車、抹窗等，但不包括步行。
劇烈運動（Vigorous physical activities）：指耗費體力的體能活動，會讓你呼吸較正常更為急促，例如跑步、踢足球、游水等。
[Happy PaMa 教得樂 第203期]
