有話說﹕參加故事工作坊 享親子閱讀樂趣

文章日期:2018年9月18日

【明報專訊】唔使Mama多講,今時今日嘅父母都知道閱讀對小朋友有好多好處,但仍然有唔少爸媽對於為小朋友揀書,或者點樣同仔女講故事都仍然有困惑。其實唔少機構和學校,都為家長做好呢方面嘅準備,等大家可以輕輕鬆鬆咁親子閱讀,享受箇中益處!

好似「好故事•送校園」活動計劃創辦人陳雅莉(Lily姐姐),會為家長搞親子故事工作坊,亦為幼稚園同小學生舉辦到校計劃,以集體講故事形式將「繪本閱讀」、「親子互動」同「故事劇場」三個有關閱讀的學習範疇結合,令睇故事成為一大樂趣。

Lily姐姐曾經喺小學做圖書館老師,修讀過戲劇教育,後來仲做埋兒童劇創作。佢同家長分享講故事技巧,教佢哋點樣同小朋友揀合適嘅圖書。

Lily姐姐同Partner陳慧瑩(Amanda)合作嘅故事工作坊,唔單止會同小朋友講故事,仲會加入手工環節;佢有時甚至單人演出互動戲劇,同小朋友演繹繪本故事。

助增親子關係 陶冶性情

點解Lily姐姐咁着力做故事推廣同戲劇教育呢?佢同Mama講:「首先我覺得家長同小朋友講故事,當中一齊閱讀、聆聽,過程非常愉快,可以增進親子關係。其次,呢樣係關於藝術同美感嘅事,如小朋友多接觸,可以陶冶性情,亦會多一點同理心,對自己同對人哋來講都會更好。」如果家長或者學校想向Lily姐姐取經的話,可以留意佢最新動向!

後記:

唔經唔覺,Mama喺呢度同大家傾偈足足兩年啦。下期開始,《Happy PaMa教得樂》會有一個新面目出現,Mama係時候功成身退,全力照顧一對馬騮仔。就此同各位爸媽講聲後會有期,教仔路上再見!

[Happy PaMa 教得樂 第208期]

明報影片