【今日直擊】吳綺莉位於跑馬地寓所，昨晚發生閉門失竊案，警方將案件暫時列作「盜竊」處理，經點算後，吳綺莉損失了17萬元財物，當中包括衣物﹑戒指和結他。
快將18歲的吳綺莉女兒吳卓林，現時與女友Andi同居，今午2時，2人一齊離開寓所，她們以街坊look打扮落街，Andi掛住吸煙，而一頭skinhead的卓林，就去了便利店買朱古力，期間她們坐港鐵到灣仔，之後去了一間找換店匯錢。
卓林發現傳媒追訪時，起初只說：「我無嘢講呀﹗（屋企的結他不見了？）唉﹗真係，唔知點解呢啲嘢我阿媽要講出嚟。（是否誤會？）根本係誤會，我有WhatsApp佢，話我返嚟攞嘢，我阿媽話ok。（手表唔見咗？）我無攞過任何嘢，我WhatsApp佢話會返屋企攞嘢。」
之後她和Andi繼續兌換錢，期間卓林再向記者說：「你哋想知發生乜嘢事嗎？OK，我同我阿媽講好咗，我要嚟攞啲嘢，攞返啲衫，攞返我自己啲嘢，咁佢話ok，咁我去到，佢唔喺度，咁我就嚟可能要出trip一兩日，我攞返幾件衫。
我入咗屋，因為我有鎖匙，佢畀我嘅鎖匙，我之前有嘅，佢冇改又冇鎖又冇盛，我話ok，我去到我攞咗幾件衫﹒攞咗我結他，如果佢唔想我攞嘅話，我依家都同佢講咗，你要番你啲嘢，你話邊樣嘢你要嘅，我畀番你冇問題，我點知你會突然間報警，我根本係好好哋同佢講好咗，跟住我話我嚟咗，屋企冇人，我攞咗幾件嘢，我話幾時返嚟呀？我仲有啲嘢要同你傾，跟住突然我收到電話話報咗警，我心諗做乜嘢啫？（媽咪聯絡你話報警？）唔係，警察無啦啦打嚟，媽咪冇搵過我。」
