Super Girls成員吳嘉熙（Cheronna）早前首次與李健宏（KB）合作，拍攝旅遊節目。節目中，KB發揮喪玩本色，走訪泰國多個地方「搞搞震」，難怪Cheronna直言今次泰國之旅勁好玩，她表示︰「今次泰國之旅係齋玩，將好玩嘅嘢分享畀大家，我哋全程都係玩，同埋做啲好傻嘅嘢，出到來感覺好好笑。」
KB與Cheronna於當地欣賞人妖騷後，即興踩入「人妖學校」學做人妖，見二人先與當地人妖近距離接觸，最後更要「變裝」做人妖騷。Cheronna表示︰「我哋睇完表演後，就要去學校，著佢哋啲衫，跟住模仿個騷表演唱跳。我以前見過人妖表演，但今次係去佢哋間學校睇佢哋台上表演，特別去學如何婀娜多姿，係好開心。」
Cheronna大讚人妖舉手投足都靚到爆，笑言麻甩的她自愧不如︰「近距離見佢哋，覺得仲靚過女人，我作為女人覺得自己好麻甩，反而佢哋食嘢斯文，一啲小動作都靚過好多女人。」
提到與KB一起「人妖初體驗」，Cheronna說︰「我同KB都化咗妝，係人妖幫我哋化，其實都好辛苦，因為我哋學埋古裝，戴好重假髮，真係唔簡單。」
變裝後，Cheronna即與男友黃奕晨開心share，不過男友似乎鍾情KB的造型，她又稱KB有做人妖潛質︰「KB化到好好笑，其實佢好有潛質做人妖，因為佢好有表演慾，只係佢個樣唔夠女人，始終有點男人味道。」
