親睹家傭搣一歲囝囝鼻仔 葉翠翠嬲爆:我好唔開心 - 20180727 - SHOWBIZ - 明報OL網

親睹家傭搣一歲囝囝鼻仔 葉翠翠嬲爆:我好唔開心 (19:31)

文章日期:2018年7月27日

葉翠翠上月底誕下第二個囝囝「小小王子」,現時這位靚媽坐月兼全力照顧囝囝。不過日前翠翠在社交平台狂呻,自爆親眼見到傭人搣一歲囝囝個鼻,翠翠於本月24日在facebook留言:「我真係好唔開心!昨天(23號)比(畀)我親眼見到工人搣小王子個鼻仔,我問佢點解要咁做,佢話係細細力,細細力咁又點?係咪就可以搣?我細細力搣你個鼻得唔得?我話平時對你咁好,你竟然咁做!我問佢有人咁搣你個仔得唔得?(佢有個仔)

工人所需要的我都會提供,如全部日用品,買衫買鞋,她喜歡的飲品食品,加人工,我全部都比(畀)佢,佢個仔生日我都有買禮物寄比(畀)佢,只要工人開心我就願意比(畀),我在醫院時比(畀)錢佢日日撘的士去醫院,對佢咁好,原來都係一樣,我真係好唔開心...我昨晚(23號)唔開心到又暈又嘔...」

翠翠接受《明報》訪問時說:「早幾天畀我親眼見佢(家傭)搣囝囝鼻哥,好唔開心囉,我平時對家傭好好嘅,就係因為對佢好,我唔明點解佢要搣佢(囝囝)個鼻。我有問佢點解,佢冇答我,我話點解你要搣佢鼻哥?太太(即葉翠翠)都唔會搣佢鼻哥,佢(家傭)話細細力,我問番佢,如果有人搣你個仔鼻哥得唔得?佢答唔得,我話我細細力搣你鼻哥得唔得,佢又話唔得,但佢又冇講點解要搣我個仔個鼻。

其實嗰刻我喺現場,我望住佢哋,我個仔捉住佢隻手,佢(家傭)就唔想我個仔捉住佢隻手,個刻我感覺到,佢(家傭)想搣佢(囝囝)鼻哥,搣痛佢等佢(囝囝)放手,我嗰刻望到呢個情況,所以我好唔開心,點解可以咁樣對1歲小朋友?」

(即時娛樂)

明報影片