無綫新晉男神余德丞（Dickson）早前參加足球賽時感不適後昏迷，一度被送往瑪麗醫院深切治療部（ICU）搶救，幸好病情轉趨穩定，現已轉往心臟科病房觀察。余德丞今日透過無綫官網big big channel報平安，親自交代現時身體情形，聲音聽到他頗為精神，中氣十足，他說：「Hello，咁多位大家好，我係Dickson余德丞，我真係覺得自己好好彩，非常之感恩，非常之開心，今次可以大步欖過，醒得番再同大家講嘢，所以衷心多謝全香港每一位關心、問候、祝福、集氣，令到我能夠醒得番，真係衷心多謝咁多位。其實真係醒番先知道，原來件事都幾嚴重，因為原來昏迷時候，我個心都停咗一段比較長時間，所以…能夠起得番身，再同大家傾偈，真係好好彩﹗咁…喺呢幾日已慢慢康復，精神咗好多，講嘢都清楚咗，當然醫生都建議留院多一段時間，Check清楚身體係咪真係OK先出到院。最後真係多謝瑪麗醫院上上下下醫護人員悉心照顧，同埋係關鍵時刻幫我做心肺復蘇的足球隊隊友，仲有屋企人每日嚟支持我，整嘢畀我食，同TVB上上下下咁多位好同事，及咁多位傳媒朋友，無咗你哋邊一位都唔得，所以希望快啲出院同大家見面，有咩新消息再通知你哋，記住，身體健康最重要﹗」
