薛家燕去年家庭、愛情及事業皆得意，兒子石耀庭結婚，跟拍拖10多年男友A君感情穩定，及舉行入行60周年演唱會，可謂大豐收的一年。
家燕姐最近與堪輿學家李居明、麥玲玲及李丞責合作，不時獲贈幾句，她說：「我屬虎，在豬年人緣比較旺，亦會有好多郁動，好適合我，我鍾意周圍去，今年會做巡迴演出。（有無問姻緣？）無問呀，但有問桃花，因為桃花對藝人來講是人緣、觀眾緣，師傅話我今年都繼續旺。我好感恩，入行60年，觀眾睇咗我咁耐都仍然喜歡我，大人、小朋友的粉絲都有。」
熱愛工作的家燕姐忙過不停，問她在豬年會否減少工作去享受人生？她說：「我個女都同我講：『媽咪，你唔使做咁多嘢㗎！』其實我好享受每個工作，鍾意唱歌、跳舞、講嘢，樣樣嘢都啱我，在工作上搵到喜悅的成就感，何樂而不為呢？當然會適可而止，會留意工作量，不會太過辛苦。（男友有否投訴太忙？）有呀！有投訴，都要同他傾吓偈！他話我去年忙到飛起，好似冇咗他的存在！其實唔係嘅，我會搵啲時間同他多啲相處了解，亦都多謝他對我嘅關懷同愛意。」
（即時娛樂）
欲知專訪詳情，請留意明天（2月13日）明報娛樂版。
