鄭裕玲（Do姐）與組合農夫（陸永及C君）多次合作主持節目，每次都擦出火花，大放笑彈，他們主持的《DO姐再Shopping》更帶挈三人於《萬千星輝頒獎禮2017》奪「最佳節目主持」，難怪被譽為黃金組合。鏡頭前，Do姐經常狂窒農夫，農夫則既要奉承又要串嘴，合拍又搞笑；鏡頭後，三人老友鬼鬼，感情要好。
今日Do姐跟陸永相遇，兩人玩自拍，她更把合照上載到社交網，只見相中的陸永冇剃鬚，跟他平日的樣子有點不同，Do姐留言：「咁嘅 @6wing_fama 你見過未！」網友紛紛留言，「Do姐小心變態佬呀」、「完全兩個人 平時不是這樣的」、「金魚叔叔呀！！」、「呢個係陸叔吧」、「Uncle 6」等，十分搞笑。
